صرف نیوز ہی نہیں حقیقی ویوز بھی

وزیراعظم مودی کی آریک سٹی کے افتتاح کے موقع پر اورنگ آباد آمد

بچت گٹ خواتین کو ایک لاکھ روپے قرض دینے کا اعلان ، مراٹھواڑہ کے لئے کوئی بڑا ترقیاتی منصوبہ نہیں

33,991

اورنگ آباد : (جمیل شیخ) آج اورنگ آباد میں آریک سٹی کے افتتاح کے موقع پر وزیراعظم مودی کی آمد ہوئی ۔ بچت گٹ کی خواتین نے اپنی محنت سے گاﺅں دیہاتوں کو مالی طاقت دی ہے ۔ جس کی وجہ سے دیش کو بھی ترقی مل رہی ہے ۔ بچت گٹ خواتین کی حوصلہ افزائی ہو اس کے تحت وزیراعظم نے اس موقع پر بچت گٹ خواتین کو ایک لاکھ روپے قرض دینے کا اعلان کیا ہے ۔ جس سے بچت گٹ خواتین میں خوشی کی لہر ہے ۔

وزیراعظم مودی نے آریک ہال ، کمانڈ کنٹرول سینٹر ، روڈ سسٹم نیٹورک ، لینڈ سسٹم اور ایمینیٹیز کا افتتاح کیا ۔ اس موقع پر وزیراعظم مودی بچت گٹ خواتین سے مخاطب تھے ۔ ملک کی تیزرفتار ترقی کے صنعتی مراکز میں اب اورنگ آباد بھی شامل ہوگیا ہے ۔ آئندہ کچھ سالوں میں بہت سارے صنعتی کاروبار یہاں شروع ہونگے ۔ اس طرح کااظہارخیال مودی نے کیا ۔ صنعتی ترقی میں مراٹھواڑہ کا بھی اپنا ایک مقام ہوگا اور بہت سارے روزگار کے مواقع فراہم ہونگے ، اس طرح کی امید بھی مودی نے جتائی ۔

آریک سٹی کے کنٹرول روم کے افتتاح کے ساتھ ہی آج کا دن مراٹھواڑہ کے لئے صنعتی شعبہ میں انقلاب برپا کرنے والا ہوگا ۔ آریک سٹی میں بڑے پیمانے پر کاروبار شروع ہونگے ۔ جس سے مراٹھواڑہ میں بڑے پیمانے پر روزگار کے مواقع فراہم ہونگے ۔ مراٹھواڑہ میں قحط سے آزاد کرانے والی ’واٹر گریڈ‘ اسکیم قابل تعریف ہے ، اس سے پینے اور زراعت کے لئے پانی میسر ہوگا ۔ اس طرح کا بھی اظہار خیال کیا ۔ لیکن بتادیں پورے پروگرام کے دوران وزیراعظم مودی نے مراٹھواڑہ کے لئے اور صنعتی شعبوں میں کام کرنے والے تاجروں اور کاروباریوں کے لئے کوئی بھی بڑا اعلان نہیں کیا ۔

آریک سٹی افتتاحی پروگرام میں بچت گٹ کی ہزاروں خواتین نے شرکت کی ۔ اس موقع پر سینکڑوں خواتین کو پریشانی کا بھی سامنا کرناپڑا ۔ پروگرام میں ایک لاکھ خواتین کی شرکت کے مدنظر پولیس انتظامیہ نے سخت اہتمام کیاتھا ۔ جلسہ گاہ پر پارکنگ کی مناسب سہولت نہ ہونے سے سینکڑوں خواتین کو پولیس نے شیندرا چوک پرروک دیا تھا ۔ جس سے مودی کے اجلاس میں پہنچنے کی خواہشمند بچت گٹ خواتین شرکت کرنے پر اڑی رہی ۔ اس کے بعد پولیس نے وہیں سے خواتین کو پیدل جانے کی شرط پر جلسہ گاہ جانے کی اجازت دی ۔ آریک سٹی کے افتتاح کے شرکت کی غرض سے وزیراعظم کی دوپہر ٹھیک ۵۱:۲ بجے ہوائی اڈہ پر آمد ہوئی ، وہاں سے ہیلی کاپٹر کے ذریعے مودی نے افتتاحی پروگرام میں شرکت کی ۔ اس وقت مودی کے ساتھ سی ایم فڈنویس بھی موجود تھے ۔ ہوائی اڈہ پر وزیراعظم مودی کے استقبال کے لئے میونسپل کارپوریشن کے میئر نندکمار گھوڑیلے ،علاقائی کمشنر سنیل کیندرےکر ، میونسپل کمشنر نپون ونائک ، پولیس کمشنر چرنجیو پرساد موجود تھے ۔

بتادیں کے تیس لاکھ تک روزگار فراہم کرنے کااندازہ آریک سٹی کے ذریعے کیا گیا ہے ۔ تمام تر سہولیات سے آراستہ یہ آریک سٹی ہوگی ۔ آریک سٹی میں آٹوموبائل شعبہ کو تیزرفتار ترقی دینے کی غرض سے فیصلہ لینے کاحق چیف سکریٹری کو دیا گیا ہے ۔ صنعتی شہر آریک سٹی میں روزگار فراہم کرنے والی کمپنیوں کو کون سی سہولتیں دی جائیں گی اس کےلئے ایک کمیٹی بھی طے کی گئی ہے ۔ اس کو کچھ مخصوص اختیارات دیئے گئے ہیں ۔ مرکزی کیبنیٹ نے ڈی ایم آئی سی کو پہلے ہی آٹھ ہزار کروڑ روپے کا فنڈ دینے کافیصلہ کیا ہے ۔ تین ہزارکروڑ دینے کا فیصلہ ۲۰۱۵ میں ہی کیا گیا تھا ۔ اب تک اندازاً آٹھ سو کروڑ آریک سٹی کو مل چکا ہے ۔ معلومات کے مطابق پہلے حصہ کا کام اب تک مکمل نہیں ہوپایا ہے ۔ اکتوبر ۲۰۱۸تک شیندرا نوڈ کا کام مکمل کرنے کا ہدف طے کیا گیا تھا ، جو اب تک نہیں ہوپایا ہے ۔

 

Leave A Reply

Your email address will not be published.