طوبیٰ جنید نے اندور میں منعقدہ 62 ویں قومی شوٹنگ چیمپیئن شپ میں  قومی سطح پر اپنی شناخت قائم کی

علی گڑھ : علی گڑھ مسلم یونیورسٹی کی بی اے سال دوئم (انگریزی) کی طالبہ طوبیٰ جنیدنے مدھیہ پردیش کے مہو اندور میں منعقدہ 62ویںقومی شوٹنگ چیمپیئن شپ مقابلہ (بگ بور) کے تین سو میٹر رائفل پرون جونیئر میں شاندار کارکردگی کا مظاہرہ کرتے ہوئے قومی سطح پر اپنی شناخت قائم کی ہے ۔

نیشنل رائفل ایسو سی ایشن نے طوبیٰ کو ہندوستان میں ایک معروف شوٹر کی حیثیت سے تسلیم کیا ہے ۔ خود اعتمادی سے لبریز ذاتی ایوینٹ میں طوبیٰ نے535کا اسکور کیا ۔ ایک شوٹر کی حیثیت سے طوبیٰ ایک یادگار کیریئر کی حامل ہیں ۔ انہوں نے مذکورہ مقابلہ میں شامل ہونے کے لئے اے ایم یو کے سابق طالب علم اور قومی سطح کے نشانے باز یاسر خاں سے محض تین ماہ تربیت حاصل کی ۔

طوبیٰ کا کہنا ہے کہ وہ اے ایم یو کے دیگر طلبہ و طالبات کو شوٹنگ کی ترغیب دلانا چاہتی ہیں ۔ ان کا کہنا ہے کہ فی الوقت ہندوستانی شوٹنگ میں سوربھ چودھری ، منوبھاکراور منیش بھان وال اپنے مظاہرہ سے گھریلو نام بن گئے ہیں ۔ طوبیٰ کا کہنا ہے کہ اے ایم یو کے طلبہ بھی اسپورٹس میں اپنا کیریئر بناکر اپنی مادرِ علمی کا نام روشن کرنے کے ساتھ اپنے ملک کا پرچم بھی بلند کرسکتے ہیں ۔ طوبیٰ کی خواہش ہے کہ وہ اولمپک اوردیگر عالمی مقابلوں میں اپنے ملک کی نمائندگی کریں ۔