کنہیا کمار نے ’بھگوان کرشن‘ کی مثال پیش کرتے ہوئے بی جے پی کو بنایا تنقید کا نشانہ

کانگریس لیڈر کنہیا کمار نے سوشل میڈیا پلیٹ فارم ’ایکس‘ پر ایک ویڈیو شیئر کی ہے جس میں انھوں نے شری کرشن اور کنس کی تصویر دکھائی ہے، ساتھ ہی کیجریوال، ہیمنت سورین اور سسودیا کو جیل میں بھی دکھایا ہے۔

شمال مشرقی دہلی لوک سبھا سیٹ سے کانگریس اور انڈیا اتحاد کے امیدوار کنہیا کمار لگاتار اس انتخابی حلقہ کا دورہ کر رہے ہیں اور بی جے پی کی عوام مخالف پالیسیوں کو تنقید کا نشانہ بھی بنا رہے ہیں۔ ان کی تقریروں پر عوام تالیاں بھی بجا رہے ہیں اور فلک شگاف نعروں سے ان کا حوصلہ بھی بلند کر رہے ہیں۔ اس درمیان کنہیا کمار نے سوشل میڈیا پلیٹ فارم ’ایکس‘ پر ایک ویڈیو شیئر کی ہے جس میں بھگوان شری کرشن کی مثال پیش کرتے ہوئے بی جے پی کو تنقید کا نشانہ بنایا ہے۔

भगवान श्री कृष्ण का जन्म जेल में हुआ और मुझे जेल में डाला गया। मेरा नाम कन्हैया है, भगवान कृष्ण के आदर्शों पर चलते हुए तानाशाही से लड़ता रहूँगा। सही के साथ और ग़लत के खिलाफ खड़ा होकर मैं मरते दम तक उस धर्म की रक्षा करूँगा जो मुझे भगवान कृष्ण से मिला है। pic.twitter.com/waI8ghHeJx

— Kanhaiya Kumar (@kanhaiyakumar) May 8, 2024

کنہیا کمار نے جو ویڈیو شیئر کی ہے اس میں کچھ کاریگری کی گئی ہے اور بیک گراؤنڈ میں کچھ تصویروں کو شامل کیا گیا ہے۔ اس ویڈیو میں وہ کہتے ہیں ’’میرا نام کنہیا ہے اور بھگوان کرشن کا جنم جیل میں ہوا تھا۔ آپ نے ہمیں جیل میں ڈالا۔ آپ اس ملک کے اپوزیشن کے منھ پر تالا لگانا چاہتے ہیں۔‘‘ ساتھ ہی وہ یہ بھی کہتے ہیں کہ ’’کرشن جیل میں پیدا ہوئے، چاہتے تو اقتدار کی تاناشاہی کے سامنے جھک کر ماما کنس کے دربار میں اپنے لیے ایک سیٹ پختہ کر لیتے، لیکن بھگوان شری کرشن نے کنس کے دربار میں جانا قبول نہیں کیا۔ گوکل والوں کی گائے چَرانا قبول کیا۔‘‘

اس ویڈیو میں کنہیا کمار نے بھگوان شری کرشن کی تصویری جھلک بھی پیش کی ہے، اور ساتھ ہی اروند کیجریوال، ہیمنت سورین و منیش سسودیا کو جیل میں قید بھی دکھایا گیا ہے۔ اس ویڈیو کے ذریعہ کنہیا کمار نے یہ ظاہر کرنے کی کوشش کی ہے کہ تاناشاہی کے خلاف آواز اٹھانے والوں کو جیل میں ڈالا جانا کوئی نئی بات نہیں ہے۔ ساتھ ہی کنہیا نے ظلم کے خلاف متحد ہو کر لڑنے کا عزم بھی ظاہر کیا ہے۔