پولس نے فٹ پاتھ کے تجاوزات  ہٹادیئے

ناندیڑ:(نامہ نگار) ناندیڑ شہر میں موٹر گاڑیوں کی تعداد میں دن بدن اضافہ ہوتا جارہا ہے ۔ سڑکوں کی چوڑائی کم اور گاڑیوں کی تعداد زیادہ ہونے سے شہر کی اہم ترین شاہراہوں پر ٹرافک کا مسئلہ پیدا ہورہا ہے ۔ فٹ پاتھ پر بھی ناجائز قبضہ جات بڑھ چکے ہیں ۔ فٹ پاتھ پیدل چلنے والے راہگیروں کے لئے مختص ہوتا ہے مگر شہر میں کئی مقامات پر فٹ پاتھ پر چھوٹے کاروباریوں نے ناجائز قبضہ جات کررکھے ہیں ۔ اس کے سبب بھی شہر میں ٹرافک کا مسئلہ سنگین ہوتا جارہا ہے ۔ ناندیڑ ٹرافک پولس شہر میں ٹرافک نظم میں بہتری کے لئے سڑک پر اُتر کر کام کررہی ہے اس کے باوجود بھی لوگوں کو کوئی راحت نہیں مل رہی ہے ۔ آج ٹرافک پولس کے عملہ نے مہاویر چوک تا کلا مندر مین روڈ پر فٹ پاتھ پر موجود ناجائز قبضہ جات کو ہٹاتے ہوئے سڑکوں کو کشادہ کرنے کی کوشش کی ۔ حالانکہ وقفہ وقفہ سے میونسپل کارپوریشن کا عملہ بھی شہر میں سڑکوں اور فٹ پاتھ پر سے ناجائز قبضہ جات ہٹانے کے لئے مہم چلاتا آیا ہے ۔

مہم کے کچھ دن بعد دوبارہ سے حالات جوں کے توں ہوجاتے ہیں ۔ ناندیڑ شہر میں ان دنوں سب سے زیادہ ٹرافک کا سنگین مسئلہ سری نگر مین روڈ ‘ ورکشاپ کارنر‘ شیواجی نگر‘ کلا مندر‘ وزیر آباد چوک‘ قدیم مونڈھا‘ برقی چوک‘ دیگلور ناکہ چوراستہ پر درپیش ہے ۔ تقریبا ۱۰ سال قبل گروتاگدی پروگرام کے دوران شہر کی کچھ سڑکوں پر ماسٹر پلان کے تحت انہدامی کاروائی کرکے سڑکوں کی توسیع کرکے اراضی حاصل کی گئی تھی ۔ پچھلے ۱۰ سال کے دوران موٹر گاڑیوں کی تعداد میں بے تحاشہ اضافہ ہوا ہے مگر سڑکوں کی چوڑائی میں کوئی اضافہ نہیں ہوا ۔ شہر میں ٹرافک کا مسئلہ دن بدن سنگین بنتاجارہا ہے ۔ اس کے لئے ضلعی انتظامیہ کو ٹھوس اقدامات اٹھانے ضروری ہے ۔