راجستھان کی ہائی کورٹ نے جے پور سلسلہ وار بم دھماکوں کے معاملے میں تمام 4 قصورواروں کو بری کر دیا

راجستھان : راجستھان کی ہائی کورٹ نے جے پور سلسلہ وار بم دھماکوں کے معاملے میں تمام 4 قصورواروں کو بری کر دیا ہے۔ عدالت نے اس کیس میں ڈیتھ ریفرنس سمیت مجرموں کی جانب سے پیش کی گئی 28 اپیلوں پر فیصلہ سنایا ہے۔

بدھ کو ہونے والی سماعت کے دوران ہائی کورٹ نے مجرموں کی اپیل کو منظور کرتے ہوئے ان کے حق میں راحتی فیصلہ سنایا ہے۔ راجستھان ہائی کورٹ کے جسٹس پنکج بھنڈاری اور جسٹس سمیر جین کی ڈویژن بنچ نے اس معاملے پر اپنا فیصلہ سنایا ہے۔ ہائی کورٹ نے اس معاملے میں مجرم قرار دیے گئے نابالغ کا معاملہ جووینائل بورڈ کو بھیج دیا ہے۔ باقی تمام ملزمان کو بری کر دیا گیا۔

اس سے پہلے سال 2019 میں جے پور کی نچلی عدالت نے جے پور بم دھماکہ کیس میں اپنا فیصلہ سناتے ہوئے اس کیس کے چاروں ملزمین کو مجرم قرار دیا تھا۔ ملزمان کو یو اے پی اے کی مختلف دفعات کے تحت قصوروار ٹھہرایا گیا تھا۔ ساتھ ہی عدالت نے ایک ملزم کو بری بھی کر دیا تھا۔ دراصل اس کیس میں پانچ ملزم تھے۔ جب نچلی عدالت نے 2019 میں سماعت کی تو ان میں سے چار کو قصوروار پایا گیا، جب کہ ایک کو بری کر دیا گیا۔

جے پور سلسلہ وار دھماکہ کیا ہے؟

آپ کو بتاتے چلیں کہ 13 مئی 2008 کو راجستھان کی راجدھانی جے پور میں سلسلہ وار بم دھماکے ہوئے تھے۔ مختلف مقامات پر 8 سلسلہ وار دھماکوں سے پورا جے پور ہل گیا۔ اس واقعہ میں 71 لوگوں کی جانیں گئیں اور تقریباً 176 لوگ زخمی ہوئے۔ اے ٹی ایس نے جے پور دھماکہ کیس میں 11 دہشت گردوں کو نامزد کیا تھا۔

اس معاملے میں اے ٹی ایس راجستھان نے پانچ ملزمین کو گرفتار کیا تھا۔ اس کے ساتھ ہی حیدرآباد پولیس نے اس معاملے سے متعلق دو دہشت گردوں کو گرفتار کیا تھا۔ دہلی پولیس کے اسپیشل سیل نے ایک دہشت گرد کو گرفتار کرنے میں بھی کامیابی حاصل کی۔ ساتھ ہی تین ملزمان کافی دیر تک مفرور رہے جبکہ دو ملزمان ہلاک ہو چکے ہیں۔