اے ایم یو میں این ای پی ایڈوائزری کمیٹی کا قیام
علی گڑھ : علی گڑھ مسلم یونیورسٹی کے وائس چانسلر پروفیسر طارق منصور نے این ای پی 2020کے نفاذ کے لیے یونیورسٹی گرانٹس کمیشن کے احکام کے مطابق یونیورسٹی میں نیشنل ایجوکیشن پالیسی ایڈوائزری کمیٹی کے قیام کی منظوری دے دی ہے۔
پروفیسر منصوراین ای پی ایڈوائزری کمیٹی کے چیئرمین ہیں جبکہ ایڈوائزری کمیٹی کے دیگر ممبران میں عبدالحمید- آئی پی ایس (رجسٹرار)، مجیب اللہ زبیری (کنٹرولر امتحانات)، پروفیسر ایس کے سنگھ (ریٹائرڈ پروفیسر، شعبہ فزکس) ، پروفیسر وسیم احمد (کنوینر، اکیڈمک پروگرام کمیٹی)، پروفیسر نثار احمد خان (ڈین، فیکلٹی آف سوشل سائنسز)، پروفیسر نعیمہ خاتون (پرنسپل، ویمنس کالج)، پروفیسر اسفر علی خان (ڈائریکٹر، ڈائریکٹوریٹ آف اسکول ایجوکیشن)، پروفیسر محمد نفیس احمد انصاری (ڈائریکٹر، سینٹر فار ڈسٹنس اینڈ آن لائن ایجوکیشن)، پروفیسر مرزا اسمر بیگ (شعبہ سیاسیات)، پروفیسر محمد پرویز (شعبہ تعلیم)، پروفیسر نشاط فاطمہ (صدر، شعبہ لائبریری اینڈ انفارمیشن سائنس)، پروفیسر عاصم ظفر (کنوینر، سویم پروگرام) اورڈاکٹر سہیل مستجاب (این ای پی سیل کے کوآرڈی نیٹر اور این ای پی ایڈوائزری کمیٹی کے کنوینر) شامل ہیں۔
اے ایم یو کے رجسٹرار، عبدالحمید-آئی پی ایس نے کہا کہ این ای پی 2020کے نفاذ کے لیے این ای پی سیل طلبہ میں لچیلے پن کو فروغ دینے اور ان کی منتقلی کو آسان بنانے کے لیے اکیڈمک بینک آف کریڈٹس کے ضوابط، اعلیٰ تعلیمی پروگراموں میں متعدد داخلے اور اخراج سے متعلق رہنما خطوط، عام ڈگری پروگرام کے نصاب کے حصے کے طور پر اپرنٹس شپ/انٹرن شپ امبیڈڈ ڈگری پروگرام کے لیے رہنما اصول،پیشہ ورانہ تعلیم کو آسان بنانے اور روزگار کو بڑھانے کے لیے یونیورسٹی کے ڈیمڈ یونیورسٹی سمجھے جانے والے اداروں کے ضوابط میں ترمیم، GER کو بڑھانے کے لیے ODL اور آن لائن تعلیم کے ضوابط، کریڈٹس کی حد کو 20% سے بڑھا کر 40% کرکے شناخت اور انضمام کے لیے سویم2021 کے ذریعے آن لائن کورسز کے لیے کریڈٹ فریم ورک کے ضوابط،اعلیٰ تعلیم کی بین الاقوامی کاری، غیر ملکی طلبہ کے لیے ون اسٹاپ رابطہ اور غیر ملکی نژاد سابق طلبہ اور بیرون ملک رہنے والے ہندوستانیوں کے ساتھ منسلک ہونے کے لیے یونیورسٹی کی سطح پر بین الاقوامی امور کے لیے دفتر کے قیام کے لیے رہنما خطوط پر بھی کام کرے گا۔