۴؍امیدواروں کے نام واپس لینے کے بعد ریاست کا سیاسی بحران ختم

ممبئی : مہاراشٹر قانون ساز کونسل کی۹؍ نشستیں۲۴؍اپریل کو خالی ہوئیں مگر ریاست میں کرونا کے قہر سے الیکشن کمیشن نے ان نشستوں کے لئے انتخابات ملتوی کر دیا تھا ۔ ریاست کے وزیر اعلی ادھو ٹھاکرے نے ۲۸؍نومبر ۲۰۱۹؍ کو بہ حیثیت وزیر اعلی حلف لیا تھا اس وقت وہ کسی بھی قانون ساز کونسل یا اسمبلی کے رکن نہیں تھے ۔ قانون کے مطابق انہیں اندرون۶؍ ماہ کسی بھی کونسل کی رکنیت حاصل کرنا ضروری ہے اس لئے انہیں۲۸؍ مئی سے قبل رکنیت حاصل کرنا ضروری ہوگیا تھا اس تعلق سے ریاستی کابینہ نےدو مرتبہ گورنر بھگت سنگھ کوشیاری کو گورنر کوٹے سے وزیر اعلی کو ایم ایل سی بنانے کی درخواست بھیجی تھی مگر گورنر نے کوئی جواب نہ دیتے ہوئے الیکشن کمیشن سے قانون ساز کونسل کی خالی ۹؍نشستوں پر انتخاب کرانے کی درخواست بھیج دیے ۔

الیکشن کمیشن نے آناً فاناً انتخاب کرانے کا نوٹیفیکشن جاری کیا جس کے تحت۲۱؍ مئی کو انتخاب کرانے کااعلان کر دیا جس کے لئے ۱۱؍ مئی تک ۱۴؍امیدواروں نے اپنا پرچہ نامزدگی داخل کیے۔مگر پرچہ نامزدگی کی جانچ میں آزاد امیدوار کی حیثیت سے فار بھرنے والے راٹھوڑ شہباز علاوالدین کا فارم رد ہونے کے بعدبقیہ ۱۳؍ امیدوار میدان میں رہ گئے۔ان میں سے ڈاکٹر اجیت مادھو راو گوپچھڑے(بی جےپی)، سندیپ سریش لیلے(بی جے پی)، کرن جگناتھ پواوسک(این سی پی)،شیواجی راو یشونت گرجے(این سی پی) نے۱۲؍ مئی کو اپنا پرچہ نامزدگی واپس لینے کے بعد صرف۹؍امیدوار ہی رہنے کی وجہ الیکشن کمیشن نے آج ان تمام ۹؍امیدواروں کو بلا مقابلہ قانون ساز کونسل کے رکن ہونے کا اعلان کر دیا۔

بلامقابلہ منتخب ہونے والے اراکین میں ریاست کے وزیر اعلی ادھو بالا صاحب ٹھاکرے(شیوسینا)، ڈاکٹر نیلم دیواکر راو گورے(شیوسینا)،بی جے پی کے ۴؍ممبران میںگوپی چند پنڈلک پڈلکر، پروین پربھاکر راو دتکے، رنجیت سنگھ موہتے پاٹل، رمیش کاشی رام کراڑ شامل ہیں۔ اسی طرح راشٹر وادی کانگریس پارٹی سے ششی کانت جیونت راو شندے،امول رام کرشن مٹکری اور کانگریس سے واحد امیدوار راجیش ڈھونڈی رام راٹھوڑ قانون ساز کونسل کے اراکین کی حیثیت سے منتخب ہوئے۔منتخب ہونے والے ۹؍ اراکین قانون ساز کونسل آنے والی ۱۸؍ مئی کو حلف لیں گے۔