ادھو ٹھاکرے کی مودی سے ویڈیو کانفرنسنگ کے ذریعہ ملاقات

ممبئی : ملک میں جب سے کرونا وائرس کو دیکھتے ہوئے لاک ڈاون کیا گیا ہے اس وقت سے لے کر اب تک وزیر اعظم نے ملک کے وزرائے اعلی سے مسلسل۵؍ مرتبہ ویڈیو کانفرنسنگ کے ذریعہ حالات کا جائزہ لیا۔ وزرائے اعلی کے مشورے ، تجاویزات اور مرکزی وزارت صحت کی جانب سے جاری کردہ ہدایات پر عمل کرنے کی بات کہی گئی۔ آج وزیر اعظم نے پانچویں مرتبہ ریاستوں کے وزرائے اعلی کے ساتھ ویڈیو کانفرنسنگ کے ذریعہ میٹنگ کی جس میں مہاراشٹر کے وزیر اعلی ادھو ٹھاکرے نے کورونا وائرس کے تعلق سے تفصیلات بتاتے ہوئے کہا کہ بے شک ملک میں اس وبائی مرض کے اثرات بڑھتے جا رہے ہیں ۔ اس لئےوزیر اعظم نریندر مودی سےمحتاط فیصلہ لینے کی اپیل کی ہے۔ انہوں نے ہنگامی خدمات کے لئے ممبئی کی ریڑھ کی ہڈی مانی جانے والی لوکل ٹرینیں شروع کرنے اور ضرورت پڑنے پر سنٹرل فورس کی مدد کے بارے میں بھی بات کی۔

ادھو ٹھاکرے نے چین کے ووہان کی مثال دیتے ہوئے کہا ‘کہ کرونا  مریضوں کی تعداد بہت زیادہ ہوسکتی ہے۔جس کے اثرات جون اور جولائی مہینے تک رہیں گے۔انہوں نے کہا کہ میں نے پڑھا ہے کہ ووہان نے دوبارہ کرونا مریضوں کی تعداد سامنے  کے تعلق سے ڈبلیو ایچ او نے متنبہ کیا ہے ۔ میرا مشورہ ہے کہ لاک ڈاؤن سے متعلق کوئی بھی فیصلہ بہت احتیاط سے لیا جائے ۔

وزیر اعظم مودی کے ساتھ ویڈیو کانفرنسنگ کے ذریعے کی جانے والی میٹنگ میں ، ادھو نے مزیدکہا کہ ‘میری درخواست ہے کہ مہاراشٹر کو بھی ضرورت پڑنے پر مرکزی فورس دی جانی چاہئے ۔ ریاست میں  پولیس پر بہت دباؤ ہے اور پولیس اہلکار بھی انفکشن کا شکارہو رہے ہیں ۔ ایک ہزار سے زیادہ پولیس اہلکار کرونا وائرس کا نشانہ بن چکے ہیں ، جن میں سے ۷؍اہلکاروں کی موت بھی واقع ہوگئی ہے۔

وزیر اعلی نے وزیر اعظم نریندر مودی سے درخواست کی کہ وہ ہنگامی خدمات میں مصروف ملازمین کے لئے ممبئی میں لوکل ٹرین خدمات شروع کریں ۔ مہاراشٹر میں کورونا مریضوں کی تعداد بڑھ کر۲۲؍ ہزار ہوگئی ہے ۔ صرف ممبئی میں ۱۳؍ ہزار سے زیادہمریضوں کا انکشاف ہواہے۔ ریاست میں کورونا کی وجہ سے۸۳۲؍ افراداس مرض میں مبتلا ہوکرفوت ہوچکے ہیں۔

انہوں نے کہا کہ عروس البلاد ممبئی میں لاکھوں کی آبادی والے سلم علاقہ  دھاراوی میں  بڑھتے ہوئے کرونا انفیکشن تشویشناک ہیں ۔ پیر کو دھاراوی میں کورونا وائرس کے ۵۷؍ نئے معاملات سامنے آنے کے بعد کل تعداد۹۱۶؍ ہوگئی ہے ۔ مرنے والوں کی تعداد۲۹؍ہوگئی ہے ۔